بلدية بيروت أغنى بلدية
بلبنان. قيمة عائداتها السنوية 380 مليون دولار وقيمة احتياطها بمصرف لبنان حوالي
600 مليون دولار.
ومع كل هالفائض، بيروت عم
تعاني من إنماء غير متوازن:
البنى التحتية سيئة. عجقة
السير كارثة. النقل العام غايب. المواقف مفقودة. الجنينات مهملة. الكورنيش مش
موجود. وفوق هيدا كلّه، البلدية مش قادرة تلاقي حلّ لمشكلة الزبالة.
وفوق الدكّة صرفت حوالي 100
مليون دولار على مشاريع لتأهيل البنى التحتية بآخر 10 سنين.
بس هالمصاري راحت لمناطق
معيّنة مع إنّه أكتر من مليونين شخص ساكنين ببيروت وعم يدفعوا ذات الضرايب ومن
حقهم كلهم يستفيدوا من هالمشاريع.
بيروت مقسمة لـ12 دايرة
بتضمّ 500 ألف ناخب، بيمثلهم مجلس بلدي واحد من 24 عضو، بيدّعوا المناصفة بالتمثيل
بس بالإسم.
لأن المجلس البلدي مركب على
أساس النظام الأكثري وهالشي بيسمح لفئة معيّنة تتحكم بكلّ قراراته.
فإذا لازم نعيد النظر بالتركيبة. 3 اقتراحات:
-
يا خلق بلديات، بتمثل كل وحدة منها دايرة وبيجمعهن اتحاد
واحد.
-
يا بينعمل انتخابات بلدية ع أساس النسبية، مع صوت تفضيلي
ضمن الدايرة.
-
يا كل دايرة بتنتخب ممثلين إلها
بالمجلس البلدي حسب عدد سكانها.
متل روما ومدريد والرياض والقاهرة.
وحدها هالحلول رح تسمحلكن
توّصلوا صوتكن. لتكون البلدية إلكن كلكن.
