ما في مشكلة نفايات. المشكلة هيي بالسياسيين.

كلن عم يستفيدوا من تجفيف البحر وطمرو مع شطو بالنفايات الخطرة والغير مفرزة، وبكلفة ملايين الدولارات.

الحلّ المستدام ما بيناسبن. لأن رح يخسروا أراضي ناويين يبيعوها بأسعار خيالية.

متل ما صار بالـNormandie ومتل ما رح يصير ببرج حمود والجديدة والكوستا برافا.

السياسيين مصرّين على المحارق لانو اقرارا صعب وبطول فترة الطمر لتطول الاستفادة.

سياسة الطمر والحرق عم تقتلنا وتقتل ولادنا بالسرطان وغير أمراض.

مشان هيك نحنا بحاجة لحلّ.

وهالحلّ موجود وبسيط. وبدّو12 شهر بس ليتطبق.

فينا كلنا نخفف كمية النفايات اللي عم ننتجها بالفرز من البيت وتعريب النفايات بالمطبخ بين عضوية وبين اللي ممكن تدويرها.

العضوي بينعمله تسبيخ بالأراضي الزراعية.

والباقي بيتمّ إعادة تدويره وبيعه.

ونحنا كمان بحاجة لتطوير وتكبير معملي الفرز بالكرنتينا والعمروسية. وهالشي بكلفة قليلة.

وأخيراً بتتحوّل 25% من النفايات الباقية لوقود بديل (RDF) بيساهم بانتاج الطاقة بمعامل الاسمنت. او بتخضع للتحلل الحراري المقفل وبتستعمل لتزفيت الطرقات والارصفة.

وبيبقى بهالحالة حوالي 5% بس من النفايات الصلبة بحاجة لطمر.

هالمشروع بحاجة لشغلتين: حملة توعية كبيرة ورقابة جدية من قبل البلديات و وزارة البيئة.

وهيك منكون حليّنا مشكلة النفايات نهائياً وأمنّا بيئة نضيفة وفرص عمل جديدة لشبابنا.